اسلام آباد۔28ستمبر (اے پی پی) پاک فوج دے سربراہ جنرل قمر جاوید باجوہ فارمیشنز دی آپریشنل تیاریاں تے اطمینان کریندیں ہوئیں ہدایت کیتی جو سارے سکیورٹی اداریاں نال رل تے دہشت گرداں دے خلاف کاروائی اچ کوئی کسر نہ چھوڑی ونڄے، کہیں وی خطرے نال نبڑݨ کیتے ہر ویلھے چوکس رہن۔ پاک فوج دے شعبہ تعلقات عامہ (آئی ایس پی آر) دے مطابق آرمی چیف جنرل قمر جاوید باجوہ دی صدارت 251 ویں کورکمانڈرز کانفرنس بدھ کوں جی ایچ کیو راولپنڈی اچ تھئی۔ فورم کوں ٻاہرلی اتے داخلی سلامتی دی صورتحال، آرمی فارمیشنز دی جاری امدادی کماں تے بریفنگ ݙتی ڳئی۔ فورم چھل متاثرین نال یکجہتی دا اظہار کیتا جیڑھے جو اوکھ اچ ہن۔ فورم متاثرین دی امداد اتے بحالی کیتے ودھ توں ودھ مدد ݙیوݨ دا عزم کیتا۔ پاک فوج دے سربراہ جنرل قمر جاوید باجوہ مصیبت اچ پھتے لوکاں تئیں پجݨ اتے انہاں دی تکلیف کوں ڳھٹ کرݨ کیتے مدد تے فارمیشنز دی تعریف کیتی۔ آرمی چیف چھل توں متاثرہ علاقیاں اچ بیماریاں دے پھیلاؤ کوں روکݨ دے اقدامات سودھے چھل متاثرین خصوصی طور ٻالاں اتے تریمتیں کوں ہنگامی طبی امداد ݙیوݨ تے آرمی ڈاکٹرز/پیرامیڈکس دی تعریف کیتی۔ آرمی چیف ہنگامی بنیاداں تے اہم رستیاں اتے مواصلاتی ڈھانچے تئیں رسائی بحالی کرݨ تے آرمی انجینئرز / ایف ڈبلیو او دے کردار دی وی تعریف کیتی۔ جنرل قمر جاوید باجوہ فارمیشنز کوں ہدایت کیتی جو او ریلیف، بحالی، تعمیر نو تے توجہ ݙیون اتے چھل توں متاثرہ علاقیاں اچ معمولات زندگی بحال کرݨ اچ مدد کرن۔ فورم سرحداں دی صورتحال ، داخلی سلامتی اتے فوج دے ٻئے پیشہ وارانہ معاملیاں تے خصوصی توجہ ݙیندیں ہوئیں سلامتی دے ماحول دا ہک جامع جائزہ ڳھدا۔ کور کمانڈرز کانفرنس اچ عزم کیتا ڳیا جو دہشت گردی کوں ولا پھپݨ کائنا ݙتا ویسی۔
